Alfajores de maicena e castaña

Escrito por el en Doces

Detalles

Racións

14 unidades

Tempo

90 minutos

Os alfajores son unha lambetada típica da maioría dos países hispanoamericanos, pero os arxentinos son dos máis famosos. O alfajor arxentino máis tradicional é o de maicena, elabórase cunhas bolachas moi suaves feitas con fariña de millo e recheas de doce de leite. A maicena mestúrase tamén con fariña de trigo para que sexa máis facil de traballar a masa e mellorar a textura. Nós quixemos probar a facelos con fariña de castaña e o resultado foi incrible!! Ademais do delicioso toque de castaña conseguimos tamén unha receita apta para celíacos!

ImprimirImprimir

Ingredientes

  • 100 g de manteiga en pomada
    (a temperatura ambiente)

  • 100 de azucre glas

  • 2 ovos

  • 1 limón

  • 120 g de fariña de castaña

  • 200 g de maicena

  • 1/2 culleradiña
    de extracto de vainilla

  • 1/2 culleradiña de fermento en pó

  • 1/2 culleradiña de sal

  • 250 g de doce de leite

  • coco relado

ImprimirImprimir

Pasos

  • Peneiramos a fariña de castaña, a maicena e o sal co fermento en pó.
  • Nun cunco mesturamos ben cun garfo a manteiga co azucre. Reservamos.
  • Lavamos e secamos o limón, relamos a monda evitando a parte branca e reservamos.
  • Engadimos á manteiga a reladura do limón e a vainilla. A continuación engadimos os dous ovos e batemos cun batedor de globo eléctrico. Despois botamos a fariña pouco a pouco e imos mesturando até obter unha masa homoxénea. Non amasamos, só mesturamos.
  • Facemos unha bóla e envolvémola en film transparente. Metémola no frigo uns 30 minutos como mínimo.
  • Cando a masa estea ben fria xa podemos traballala. Para isto botamos fariña sobre unha mesa, e cun rolete estendemos a masa até obter un grosor de medio centímetro máis ou menos.
  • Cunha forma redonda cortamos circuliños de masa e imos colocándoos nunha bandexa de forno sobre papel de forno.
  • Prequentamos o forno a 155º C sen ventilador e cando academos a temperatura metemos as bolachas, deixámolas uns 7 minutos máis ou menos. Non se poden dourar, teñen que ficar branquiñas.
  • Agardamos a que arrefríen. Finalmente, colocándoas sobre a mesa, e con cuidado de non rompelas imos unindo as bolachas de dúas en dúas con doce de leite no medio. Cando as teñamos unidas prememos no medio para estender ben o doce de leite até que sobresaia un pouco polos lados.
  • Finalmente pasamos os bordos de doce de leite polo coco relado.